بنت من اللي علمتهم فالماكينة جابت ليا حلوى وقالت هادي من أمي كتسلم عليك، فرحت بها ماشي حيث الحلوى ولكن حيث هضرات عليا فالدار بشي حاجة زوينة، أنا كنعيط عليها ملي كتسرع وكتخسر القطعة وكنقول يمكن كتمشي وهي كارهاني، قالت أمي بغات تعرف شكون الخالة اللي كنحكي عليها كل نهار، قلت ليها راه باقي صغيرة على الخالة وضحكنا، ولكن الاسم كيعجبني ما نكذبش، فطريق الرجوع بقيت حاضية العلبة باش ما تهرسش، قسمت منها مع الدراري وخليت شوية نديهم فالنهار الموالي للبنات، بنتي قالت لي غير كلي نتي مرة، كليت وحدة أخرى وهي كتشوف فيا.

كنت كنشوف المسلسل وبنتي بدات كتسرح ليا شعري وقالت أمي خلي راسك واقف ما تحركيش، بحال إلا أنا اللي كنصعّب ليها الخدمة، ولكن الصراحة يدها خفيفة وعجبني الحال، دفّيت رجليا تحت الغطا والولد الصغير حاط راسو على فخذي حتى ولات رجلي ثقيلة، ما بغيتش نفيقو وبقيت كنحرك صباع رجلي بشوية، فالنهار كامل كنخدم بيديا وبالليل شي حد كيدير ليا حاجة وأنا غير كالسة هادي زوينة، غير هي شدت خصلة وزادت فيها شوية قلت ليها آ البنت راه عندي راسي تحت الشعر وضحكنا بجوج، ملي شفت المراية لقيتها دارت ليا ضفيرة طويلة، خليتها حتى للصباح ما بغيتش نحلها.

بغيت نخيط غلاف صغير للمخدة من بقايا الثوب فالدار، لقيت لونين كل واحد قليل وقلت نجمعهم، البنت بدات توريني تصاور فالتليفون وولات المخدة خاصها رسم وحساب وقياس جديد، أنا كنت باغا غير حاجة نديرها بيدي نهار الحد بلا ما واحد يحسب ليا شحال خرجت، ولكن عجبني واحد الشكل وبقيت كنقلب القطع باش يجيو بحالو، دابا كنفكر واش نقص هادي صغيورة ولا نخليها على قدها ونبدل الرسم، فالمعمل القياس كيعطيه الشيف وأنا نتبع، هنا القرار عندي ووليت كنراجعو كل دقيقة، خليت الثوب فوق الكرسي حتى نشوفو غدا بعين أخرى، غير ما يجلس عليه حتى واحد.