بعد الظهر رجعت الملحق وحطيت ظهري على الأرض شوي قبل القيلولة، أم الولد تقول السرير موجود وأنا أدري إنه موجود بس بعد شغل تحت الدينة أحس أبي أمد رجولي ويدي على راحتي. أرض الصالة باردة من المكيف وظهري كان حار حتى بعد ما غيرت القميص، شوي شوي ارتخت كتوفي وصرت أسمع صوت المكيف أكثر من الورشة اللي باقي في أذني. جابت لي مخدة وحطتها تحت راسي وقالت لا تنام هنا للليل، قلت عشر دقايق بس وصحيت وهي تضحك لأن عشر دقايقي طولت. قمت خفيف الحمد لله، بس علامة طرف المخدة على وجهي راحت معي لين عند أمي والقهوة.

أم الولد خلتني أحط يدي على بطنها وقالت انتظر لا تشيلها، وأنا انتظر ولا صار شي وقلت يمكن الولد نايم مثلي. يوم جيت أقوم حسيت دفعة صغيرة تحت يدي، جلست مكاني أطالع فيها وهي تضحك علي. أدري إنه يتحرك من قبل وهي تقول لي، بس يوم حسيت أنا صارت السالفة غير. رجعت حطيت يدي أنتظر الثانية وتأخر علينا، قلت من الحين ما يسمع الكلام. بالاستراحة كنت بقول للربع ثم دخلوا في سوالف المباراة ونسيت أو ما لقيت وقت، ما أدري. رجعت البيت وسألتها تحرك بعدي ولا لا، قالت كثير. ما شاء الله كل شغله وأنا غايب.

نختار مكان أغراض الولد في الغرفة وكل مكان أقوله أم الولد تطلع منه مشكلة، هذا عند المكيف وهذا يقفل درجها وهذا بعيد عنها. كنت بقول شوفي اللي يريحك بس قالت أبي رأيك أنت مو أبشر وخلاص. قعدت أطالع الغرفة وأقيس بعيني مثل إذا جابوا بوابة يبون نركبها، المشكلة كل شي لحاله له مكان لكن إذا جمعته ما يمشي. قلت نحرك خزانتي شوي ونشوف، قالت من أول قل كذا. يوم فتحتها عشان أنقل الأغراض لقيت نصها كراتين فاضية أنا محتفظ فيها وما أعرف ليه. إن شاء الله الولد أغراضه أقل من كراتيني، مع إني شفت اللي اشترته أمه وأظن ما عنده نية.